Abantu basatu abaasunsulwamu okuvuganya ku kifo kya Vice Chancellor ku ttendekero ekkulu ery’e Makerere balabiseeko eri abantu nga buli omu ayanja ensonga ze lwaki agamba nti yaasaanira okulya ekifo kino.
Abavuganya mulimu Kakensa Edward Kirumira nga ono y’akulira ekitongole ekisomesa ensonga za Humanities and Social Sciences, Kakensa Barnabas Nawangwe nga ono ye Deputy Vice Chancellor avunaanyiziba ku nsonga z’ebyensimbi ate ne Kakensa Venacious Baryamureeba nga ono yali Vice Chancellor ku ttendekero ekkulu e Makerere.
Bonsatule bano buli omu aliko waasimbye essira, nga Kakensa Edward Kirumira yeeyamye okukola ennyo okutereeza okusoomooza kw’ebyenfuna awamu n’okwongera okutumbula ebyenjigiriza. Ate ye Kakensa Nawangwe yeerayiridde okuteeka essira mu kukozesa ettaka ly’ettendekero naddala eryo eritakozesebwa lisobole okuvaamu ensimbi eziddukanya ettendekero songa ate Kakensa Venacious Baryamureeba n’ategeeza nti ye ku bayizi okukozesa ebyuma bi kalimagezi kw’agenda okusinga okuteeka omulaka.