Omubaka wa Kawempe North Hon. Ssegiriinya Muhammad akyalideko Alhajji Abdul Nadduli mu maka ge e Luweero. Amwebazizza okuyimirirawo nabo saako n’okumukubagiza olwokufiirwa mutabani we Jakana Nadduli.

Kkooti y’eggye lya UPDF etuula e Makindye olunaku olwaleero eyimbudde Bannakibiina kya NUP abakwatibwa e Kalangala 4 ku 32 abasigalayo nga bano bavunaanibwa omusango gwokusangibwa n’ebintu by’amaggye.

Abayimbuddwa kuliko; Ronald Mayiga, Richard Nyombi, Shafic Ngobi ne Kenneth Kamya. Okusinziira ku Ssentebe wa Kkooti eno Brig. General Freeman Mugabe, agamba nti bano 4 baleese ababeyimirira nga balina ebisaanyizo so nga abalala 28 ababeyimirira bebaleese babaddeko akabuuza.

Brig. Mugabe alagidde abasibe bano 4 buli omu okusasula emitwalo 50 nga tebanayimbulwa ku kakalu ka Kkooti. Ono era alagidde ababeyimiridde buli omu okuteeka omukono ku Kakalu akatali ka buliwo ka bukadde 2 buli omu. Bano baweereddwa akakwakulizo kobutafuluma Disitulikiti okuli Kampala ne Wakiso nga tebafunye lukusa lwa Kkooti. Kkooti era ebategeezezza nti singa banamenya obukwakulizzo buno tejja kulonzalonza kusazaamu kakalu kano.

Abalala 28 baziddwayo e Luzira ku alimanda wabula nga bakuzzibwa mu Kkooti enkya okuwulira emisango egibavunaanibwa nga Bannamawulire wamu n’abantu baabwe mwebatagenda kubeera nga batya okulaba ababalumiriza kuba bayinza okubatuusaako obulabe.

Katikkiro Charles Peter Mayiga olunaku olwaleero akomyewo mu woofiisi okukakalabya emirimu gy’Obwakabaka, oluvannyuma lw’okumalako oluwummula. Ono yebazizza nnyo omumyuka we asooka Owek. Dr. Twaha Kawaase ne Baminisita abalala olw’okuddukanya obulungi emirimu gy’Embuga waatabadde.

Ababaka ba Palamenti Bannakibiina kya National Unity Platform – NUP Allan Ssewanyana owa Makindye West ne Muhammad Ssegiriinya owa Kawempe North olunaku lw’eggulo beetabye mu kitambiro ky’emmisa eky’okwebaza Katonda okubawonya ekkomera lyebamalamu emyaka ebbiri ku misango egyekuusa ku bijambiya ebyali e Masaka mu mwaka 2021.

Mu kitambiro ky’emmisa ekyabadde ku Ekereziya ya St. Agnes e Makindye Ababaka bano balumbye abamu ku Babaka banaabwe bebagamba nti babadde bafuyirira kanwe mbu baleme kuyimbulwa basobole okweddiza ebifo byaabwe.

Abasaabaze ababadde batambulira mu Coaster e Kataza Bugoloobi mu Kampala olunaku lw’eggulo bawaliriza musaabaze munaabwe omukyala eyakasuse akaveera akalimu kasasiro wabweru w’eddinisa okufuluma akalondewo.