Bannayuganda naddala ab’ekibiina kya Democratic Party bali mu kiyongobero olw’okufa kwa abadde Ssaabawandiisi w’ekibiina, Mathias Nsubuga Birekeraawo.
Birekeraawo yafuna ekirwadde kyokusannyalala ekyamutuusa okutwalibwa mu ddwaliro lya Case Clinic nga biwala ttaka gyeyafiiridde akawungeezi akayise. Ekirwadde kino okuva lwekyamukwata ku nkomerero ya ssabbiiti ewedde abadde taddangamu kuteererera ddala wadde n’akatono.
Mathias Nsubuga yaliko omubaka mu Palamenti ng’ akiikirira ekitundu ekyobukiika ddyo obwa Bukoto ekisangibwa mu Disitulikiti y’e Lwengo.
Ajjukirwa mu kuteekateeka olukungaana olukyasembyeyo olwa Ttabamiruka w’ekibiina kya DP olwatuula mu Katomi Kingdom Resort ekiri ku luguudo oluva e Kampala okudda e Ntebe nga luno lwaliyo mwaka guwedde 2015.
Abamu ku babaka aboogedde ku nfa ya Hon. Birekeraawo omuli, Hon Florence Namayanja bagamba nti bakubiddwa enkyukwe yamaanyi ate ye Minisita Frank Tumwebaze agamba nti Birekeraawo abadde musajja ayagala ennyo okuteesa. Kitalo! Tuli baakukuwa byonna ebinaddirira.