Omukulembeze wa National Unity Platform Robert Kyagulanyi Ssentamu aka Bobi Wine avuddeyo neyewuunya abebyokwerinda okutegeeza nti tebalina basirikale bamala kubawa bukuumi ku mukolo gwabwe ogwokuggulawo ekitebe so nga baafunye abo bebayiwawo okulemesa omukolo gwabwe wadde nga babadde tebabasabye.

Ono agambye nti babategeezezza nti Pulezideti Yoweri Kaguta Museveni yabadde wakubeera mu Kawempe ku lunaku lwe lumu. Ono agamba nti omukolo gwabwe bagwongezaayo okutuusa olunaku lw’enkya nti era kasuubire tebaveeyo nensonga endala.

Ababaka ba Palamenti abali ku ludda oluvuganya Gavumenti nga boogera ku ky’abebyokwerinda okulemesa omukolo gwabwe ogwokuggulawo ekitebe ky’ekibiina kya National Unity Platform e Makerere – Kavule olwaleero.

Bano bagamba nti nsaalwa ya Gavumenti ya National Resistance Movement – NRM emaze kumpi emyaka 40 mu buyinza naye nga tezimbanga kitebe kya kibiina.

Akulira oludda oluwabula Gavumenti Hon. Mathias Mpuuga Nsamba atandise okutalaaga ebitundu ebyenjawulo okusisinkana Ab’enganda z’abawagizi baabwe ababuzibwawo.

“YUDA SSEMPIJJA ALIWA?

Ssempijja yawambibwa nga 19 December 2020 okuva e Kabembe mu Gombolola ye Kyampisi, District ye Mukono mu Kyaggwe.

Yawambibwa n’abantu abalala 5 oluvanyuma abayimbulwa kyokka yye nabuli kati talabikanga.”

Pulezidenti w’ekibiina kya National Unity Platform, Robert Kyagulanyi Ssentamu aka Bobi Wine ategeezezza nti okuggulawo ekitebe ky’ekibiina ki NUP e Makerere – Kavule okubadde kutegekeddwa olwaleero kwongezeddwayo okutuuka olunaku olw’enkya ku ssaawa 5 ezookumakya.

Kino kiddiridde ab’ebyokwerinda okusalako ekitebe kino amakya galeero nga tebakkiriza muntu yenna wadde okukisemberera.

Ekifaananyi kya Frank Ssenteza, omu ku bakuumi ba Pulezidenti wa National Unity Platform – NUP Robert Kyagulanyi Ssentamu aka Bobi Wine eyattibwa mu kalulu ka 2021 kisiigiddwa ku bisenge ebiri mu Kitebe ky’ekibiina kino ekiggya ku Makerere – Kavule mu Kawempe.

Ssenteza yafa nga 27 December, 2020 oluvannyuma lwebigambibwa nti yatomerwa emotoka y’amaggye nnamba H4DF 2382 e Busega mu Kampala abebyokwerinda bwebaali bagezaako okutangira abakulembeze ba NUP wamu n’abawagizi baabwe okwolekera eddwaliro ly’e Lubaga abawagizi b’ekibiina abawerako gyebaali batwaliddwa okufuna obujanjabi.

Ab’ebyokwerinda bayungudde abawanvu n’abampi nebabayiwa ku kitebe ky’ekibiina ki National Unity Platform – NUP ekiggya e Makerere – Kavule okulemesa enteekateeka y’okuggulawo ekitebe kino mu butongole era tebakkiriza muntu yenna kuyingira.

Kino kiddiridde RCC wa Kawempe, Ndidde Yasin Njasabiggu okulagira abakulu mu kibiina kino okunoonya olunaku olulala kuba olwaleero luliko omukolo omulala nga tebalina busobozi kuwa mikolo gyombi bukuumi.