Maj. General Kahinda Otafiire, Minisita avunaanyizibwa ku nsonga za Ssemateeka ategeezezza ababaka mu Lukiiko olukulu olw'eggwanga nti agenda kusisinkana Ssaabapoliisi General Kale Kayihura ku nsonga ezikwatagana n'okukwatibwa kwa Muhammad Kirumira eyali DPC w'e Buyende.
Gyebuvuddeko omwezi guno, Police yayungula abawanvu n'abampi nebazinda amaka ge agasangibwa e Gogonya Bulenga mu Disitulikiti y'e Wakiso, bamale beeyambisa amaanyi omwali n'okusala oluggi nebamutwala okuvunaanibwa misango.
Otafiire annyonnyodde bingi ku nsonga eno era n'ategeeza nti agenda kukola kyonna ekisooka ensonga eno eggwe bulungi. Byonna abinnyonnyodde ba kakiiko ka Palamenti akavunaanyizibwa ku kulera eddembe ly'obuntu.