Aduumira Police mu ggwanga General Kale Kayihura afuumudde ba Ofiisa ba Police musanvu mulamba ku Police y’e Kawempe, nga n’akulira okunoonyereza ku buzzi bw’emisango, Ruth Katusiime mw’omutwalidde
Kino kizze nga wayise olunaku lumu nga Ssentebe wa Disitulikiti y’e Nakasongola, Sam Kigula akukkulumidde Ssabapoliisi Kayihura olw’aba Ofiisa bano okusukka ebitundu mwebalina obuyinza nebayoola abantu.
Kigula ategeezezza Ssaabapoliisi nti ba Ofiisa bano okuva ku Police e Kawempe baagenda e Nakasongola ku lwomukaaga lwa ssabbiiti ewedde ku kyalo ekimanyiddwa nga Wabigalo ekiri mu Tawuni Kanso y’e Nakasongola nebagombamu obwala Disan Musisi ateeberezebwa okuba mu misango gy’ebyettaka nga tebategeezezza ku Police ya kitundu ekyo wadde omukulembeze yenna.
Ayongerako nti bano baakuba n’omukka ogubalagala mu bantu ssaako n’amasasi mu bbanga nga bagezaako okwetakkuluza ku batuuze abaali bataamye obugo nga tebabakkiriza kutwala Disan Musisi gwebaakwata nga tebafunye lukusa kuva mu b’obuyinza abatwala ekitundu ekyo, era wano n’asaba Kayihura abakoleko ng’obuyinza bwebulagira .
Kigula bino abifuuye Kayihura mu musomo Ssaabapoliisi mwasisinkanidde abaduumira Police mu zi Distulikiti ne mubitundu eby’enjawulo ssaako n’abakulembeze b’ekitundu oguyindira ku Luweero Guest House e Lweero nga muno mulimu ba Ofiisa okuva mu bitundu bya Sezibwa, Savannah ne Wamala .