Omumyuuka w’omuduumizi wa Uganda Police Force DIGP Maj. Gen. Paul Lokech, avuddeyo nalagira ttiimu z’ebyebyokwerinda zonna okulekerawo okukozesa emotoka ezibikiddwa ennamba oba ezitalina nnamba mu bikwekweto byokukwata abamenyi b’amateeka.
Kino wekigidde nga waliwo emotoka ezitalina nnamba ekika kya Toyota Hiace ezimanyiddwa nga drone ezikozesebwa okulumba amaka ne bizineesi zaabo abalowoozebwa okuba nga bawagira oludda oluvuganya Gavumenti.
Omwogezi wa Poliisi CP Fred Enanga yagambye olunaku lweggulo nti Maj. Gen. Lokech yalagidde nti ebikwekweto bino birina okugoberera ebiragiro ebyateekebwawo okuyitamu okukwata omuntu nti era nabo abakozesa emotoka ezitaliiko nnamba oba ezibikiddwa balina okukikomya bunnambiro.