Omuwabi wa Gavumenti olunaku olwaleero avuddeyo nasuula omusango ogw’okusobya ku mukazi ogumaze emyaka 12 nga gubadde guvunaanibwa Rtd. Col. Kiza Besigye.
Ekiwandiiko ekisuula omusango guno kyaleteddwa Senior Assistant DPP David Ndamurani-Ateenyi nakikwasa Assistant Registrar wa Court of Appeal, Mr Ayebale Tumwebaze.
Okusinziira ku mulamuzi wa Kkooti enkulu John Bosco Katutsi, yavaayo nagamba nti Gavuementi yalemwa okuleeta obujulizi obumala okulaga nti ddala Besigye omusango yaguzza era bwatyo nasala omusango guno mu 2006 nti talina musango. Wabula bano bavaayo nebaddukira mu kkooti ejjulirwamu.
Dr. Kizza Besigye abadde avunaanibwa okusobya ku Joanita Kyakuwa, emirundi ebiri egy’enjawulo mu 1997 ne 1998 era nga Kyakuwa yaddukira ku Poliisi okuwaba omusango guno mu 2001.
Omulamuzi yagamba nti ku bajulizi omusanvu abaleetebwa Gavumenti, obujulizi bwa muntu omu Kyakuwa bwebwali busobola okukozesebwa. Wabula nti era nabwo bwalimu ebituli biyitirivu kuba yali tajukira lunaku na mwezi gwagamba nti mwebamusobezaako. Yalemwa n’okubala emyaka gyalina, nti era Besigye bweyamala okumusobyako yamulinda agende okumuleetera towel yelongoose nga kino kyayongera ebibuuzo ku muntu asobezeddwako okulinda amusobezaako amuleetere towel yesimuule.
