Uganda Police Force evuddeyo nefulumya ekiwandiiko kukuttibwa kwa Clerk Mukisa Ronnie 43, eyali akola ne IBC Advocates netegeeza ngabantu 4 bwebakwatiddwa okuli; Karedou Robert Irama, Mukyala we Nalwoga Brenda Cathy, Cpl Anyuse Max Geoffrey, omusirikale w’eggye lya @UPDF eyadduka e DRC neyefuula omukuumi wa Karedou, ne SP Irama Vincent, omusirikale wa Poliise akolera mu KMP North.
Okusinziira ku bujulizi obwakakuŋŋaanyizibwa bulaga nti Mukisa ne Karedou Robert wamu ne mukyala we Nalwoga Brenda, baali bamanyiganye bulungi nti wabula bafunamu obutakaanya mu bizineesi zaabwe. Karedou ne Nalwoga bagamba nti Mukisa yabba ssente zaabwe akakadde ka ddoola 1, bwebatyo nebategeezaako mukwano gwabwe SP Irama Vincent era bonna wamu bafuna Cpl Anyuse Max, okubattira Mukisa.
Nga 30-May, Anyuse yafune emmundu gyeyadduka nayo okuva e DRC nagoberera Mukisa eyali atambulira mu motoka ye ekika kya Subaru legacy, nnamba UBJ 006K, dark blue, okutuuka mu maka ge e Kitoko-Birongo, Ndejje Division. Yamukuba amasasi 4, bweyali asembera okuggalawo ggeeti emirundi ebiri era nafiirawo.
Anyuse bweyali ava mu kifo weyattira Mukisa, yakubira Nalwoga essimu namutegeeza nti yali amalirizza omulimu.
Abebyokwerinda basooka kukwata Karedou, mukyala we Nalwoga ne Cpl Anyuse, okuva mu maka ga Karedou mu Kasana LC I, Kulambiro. Bwebafuuza amaka gano bazuula magaziini z’emmundu ekika kya AK47 2 nga mulimu amasasi 52, ebyambalo by’amaggye n’ebirala.
Poliisi egamba nti yadde nga mukukunya Cpl Anyuse okwasooka yategeeza nti yakozesa mmundu ya SP Irama, okutta Mukisa wabula yekyuusizza nabatwala awali emmundu gyeyakozesa ngeno gyeyadduka nayo okuva e DRC. Eno yasangiddwa emabega wa Boys Quaters z’ennyumba ezipangisibwa e Kitiko-Birongo, ngezingiddwa mu kaveera. Ono akakasizza nti omusirikale wa Poliisi, SP Irama Vincent, yeyakubiriza olukiiko olwategeka okutta Mukisa.
SP Irama yakwatiddwa okuva ku Poliisi e Kawembe era bwebakebeddwa awaka we baggyeeyo basitoola eyamuweebwa ku mulimu wamu n’emmundu ekika kya AK47 ngerimu amasasi 30.
Amasasi 2 gabadde gakateekebwamu. Emmundu zombi ziweereddwayo okwekebejjebwa abakugu. Emmundu endala ezuuliddwa olwaleero nga 12.06.2023.